एनपीएलमा शीतले बदल्न सक्छ जितको समीकरण ?

काठमाडौंको मौसम, पिचको व्यवहार र शीतले बेलुका हुने २१ खेलमा बलिङ, ब्याटिङ तथा फिल्डिङको समीकरण बदल्न सक्नेछ।

काठमाडौँ — नेपाल प्रिमियर लिग (एनपीएल) को तेस्रो सिजन सोमबारबाट सुरु हुँदा एउटा प्रश्न महत्त्वपूर्ण रहनेछ र त्यो हो, शीतको प्रभाव यसपल्ट कस्तो रहने छ त ? यो प्रश्नको उत्तर किन पनि असाध्यै आवश्यक छ भने यसले पूरा प्रतियोगितालाई प्रभावित पार्न सक्नेछ ।

यसपल्ट कुल ३२ खेल हुनेछन् । त्यसमध्ये २१ खेल डे नाइटका रूपमा बेलुका ५ बजे सुरु हुनेछन् । बाँकी ११ खेल भने दिउँसो साढे १२ बजे हुनेछन् । यी दिउँसो हुने खेलमा शीतको कुनै भूमिका हुने छैनन् । तर फ्लड लाइट्समा हुने बाँकी खेलमा भने शीतको कुनै न कुनै भूमिका रहनेछ ।

प्रतियोगिताका अधिकांश प्रमुख खेल बेलुका नै हुनेछन् । त्यसमा फाइनलसहित दुई क्वालिफायर तथा एक इलिमिनेटर सबै यही समयका हुने खेल रहेका छन् । त्यसैले यी समयमा हुने खेलमा सहभागी हुने टिमले शीतले ल्याउने फरक समीकरणको ध्यान दिनुपर्ने नै छ । शीतले बलमाथि नियन्त्रण लिन गाह्रो हुनेछ, त्यसैले यो बलरका लागि बेफाइदा हुनेछ, त्यसैले यो ब्याटरका लागि भने आफूअनुकूल स्थिति बनाउन सक्ने अवसर हुनेछ ।

फिल्डिङका बेला पनि शीतले समस्या हुन सक्नेछ । अबको पूरा कात्तिक महिनाको मौसम कस्तो हुनेछ, काठमाडौंमा कत्तिको जाडो हुनेछ, त्यसले धेरै अर्थ राख्नेछ । फिल्डिङका बेला पनि शीतले समस्या हुन सक्नेछ । अबको पूरा कात्तिक महिनाको मौसम कस्तो हुनेछ, काठमाडौंमा कत्तिको जाडो हुनेछ, त्यसले धेरै अर्थ राख्नेछ । अन्तिम चार खेल भने मंसिरको पहिलो साता हुनेछन् । कीर्तिपुरको त्रिवि अन्तर्राष्ट्रिय क्रिकेट मैदानको आइतबारको स्थिति हेर्नु हो भने शीतले धेरै निर्णायक भूमिका नखेल्न सक्नेछ, कम्तीमा यो सुरुआती आधा खेलमा यस्तै हुनेछ । पहिलो सिजनमा शीतको समीकरण नै थिएन किनभने सबै खेल दिउँसो भएका थिए । दोस्रो सिजन जति पनि खेल बेलुका भए, त्यसमा खासै शीतले धेरै फरक पारेको थिएन । त्यसमाथि झन् अहिले महिना दिन अगाडि नै प्रतियोगिता हुन लागेको छ ।

प्रतियोगितालाई लिएर एक साता अगाडि भएको मिडिया डेमा नेपाल क्रिकेट संघ (क्यान) का सचिव पारस खड्काको अनुमान थियो, शीतले प्रभाव कमै मात्र हुनेछ । त्यस्तै अम्पायरको भूमिकामा रहने देवेन्द्र सुवेदीको पनि उस्तै अनुमान थियो, शीत निर्णायक नहुन सक्छ । तर दुवै एउटा तथ्यमा के सहमत छन् भने अबको दिनमा मौसम कस्तो हुनेछ, त्यसमा धेरै निर्भर हुनेछ ।

कीर्तिपुर मैदानमा उपलब्ध ६ पिचमध्ये ४ वटासम्म प्रयोगमा आउनेछन् । सम्भवतः यिनीहरूको व्यवहार ब्याटर र बलर दुवैलाई समान रूपमा मद्दत गर्ने खालमै हुनेछ । केही हदसम्म अनुमान के पनि छ भने पिचले ब्याटरलाई नै अलिकति बढी मद्दत गर्नेछ । त्यसैले प्रतियोगितामा जुन टिमको ब्याटिङ अलिकति बढी चल्नेछ, त्यसको जित्ने सम्भावना बढी हुनेछ, बलरको तुलनामा ।

त्यसो भए, टसको जित–हार कत्तिको महत्त्वको हुनेछ त ? यसको ठोस उत्तर हो, यसपल्ट टस कसले जित्यो र कसले हार्‍यो भन्ने तथ्यले खेलको नतिजामा धेरै प्रभाव पर्ने छैन । अझ स्पष्ट रूपमा भन्दा टस हारेकै कारण खेल पनि हार्नुपर्ने भन्ने आरोप उचित रहने छैन । त्यसैले टस जित्दा पहिले ब्याटिङ गर्ने कि बलिङ गर्ने निर्णय धेरै हदसम्म टिमको स्थितिमा भर पर्नेछ ।

अझ भन्ने हो भने खास दिनको खास स्थितिमा टस जितेर जुन निर्णय गर्नु ठीक हुनेछ, त्यही उपयुक्त हुनेछ । बेलुका हुने खेलमा केही हदसम्म पहिले ब्याटिङ गर्नु ठीक हुन सक्नेछ तर यो पनि यही भन्ने हुने छैन । सुरुआती केही खेल हेरेपछि धेरै थोक छर्लङ हुनेछ, कुन बेला के ठीक हुनेछ भनेर । यसमा शीतको भूमिका, पिचको व्यवहार र टस जितेर के गर्ने भन्ने निर्णय सबै पर्छन् ।