चारवटा काठेपुल निर्माण भएपछि चुमभ्यालीमा रोकिएका पर्यटक र स्थानीयहरू हिँड्न थालेका छन् भने खाद्यान्न ढुवानीसमेत सहज भएको छ।
गोरखा — कात्तिक १३ र १४ को बाढीले काठेपुल बगाएपछि अवरुद्ध रहेको मनास्लु पदमार्गअन्तर्गतको चुमनुब्री–६ सर्दिभिरको बाटो खुलेको छ । सर्दिभिर क्षेत्रमा चारवटा काठेपुल निर्माण गरी शुक्रबार बाटो खुलाइएको लोक्पाका शेराप गुरुङले जानकारी दिए । ‘काठेपुल बनाएर सकियो, आज (शनिबार) बिहानै पर्यटक र स्थानीयहरू चुमभ्यालीतर्फ हिँडिसकेका छन्, माथि रोकिएकाहरू पनि तल झर्न थालेका छन्,’ उनले भने ।
असोज २५ को बुढीगण्डकीको सहायक उङ्गिलुङ खोलामा आएको बाढीले चुम्चेत र छेकम्पार पुग्ने एक मात्र पैदलमार्गमा सर्दिभिरको क्यान्टिलिभर (भिर खोपेर बनाएको पुल) बगाएको थियो । पुल बगाएपछि सर्दिभिरमा काठेपुल राखेर आउजाउ सुरु गरिए पनि फेरि कात्तिक १३ र १४ को बाढीले बगाएको थियो ।
‘बगाएको काठेपुल मर्मत गरेर फेरि बाटो सुचारु गरेका हौँ,’ उनले भने, ‘आज पनि केही मर्मतको काम त बाँकी छ, तर हिँड्न मिल्ने गरेर हिजो पुल मर्मत सक्यौँ ।’ चुम उपत्यका जाने अवरुद्ध बाटोमा आपत्कालीन काठेपुल राखेर आउजाउ सुचारु गरिएको चुमनुब्री गाउँपालिका अध्यक्ष निमा लामाले बताए ।
गाउँपालिकाको प्रकोप व्यवस्थापन कोष, मनास्लु संरक्षण क्षेत्र आयोजना र विभिन्न सहयोगीबाट खाजा व्यवस्थापन गरी पुल निर्माण गरिएको उनले बताए । ‘पर्यटक र स्थानीय आउजाउ सुरु भइसकेको छ, खच्चड पनि हिँड्न मिल्ने गरेर आज बाटो केही फराकिलो बनाउँछौँ,’ उनले भने ।
सर्दिभिर क्षेत्रमा आउजाउ ठप्प हुँदा चुमभ्यालीमा खाद्यान्न ढुवानी तथा आउजाउमा समस्या रहँदै आएको थियो । अहिले अस्थायी रूपमा बाटो सुचारु गरेर अध्ययन गरी दीर्घकालीन रूपमा पुल राख्ने गाउँपालिकाको योजना छ ।
हरिराम उप्रेती कान्तिपुरका गोरखा संवाददाता हुन् ।
.jpeg)
