सीबीएसको प्रक्षेपणअनुसार डेमोक्र्याटले कम्तीमा २१८ सिट जित्ने देखिएपछि दुई वर्षदेखि रिपब्लिकनको नियन्त्रणमा रहेको सदन परिवर्तन हुने भएको छ।
काठमाडौँ — अमेरिकी प्रतिनिधिसभामा डेमोक्र्याटिक पार्टीले बहुमत हासिल गर्ने प्रक्षेपण गरिएको छ । यससँगै पछिल्लो दुई वर्षदेखि रिपब्लिकन पार्टीको नियन्त्रणमा रहेको प्रतिनिधिसभा डेमोक्र्याटको हातमा जाने देखिएको छ ।
बीबीसी को अमेरिकी साझेदार सीबीएसका अनुसार डेमोक्र्याटिक पार्टीले कम्तीमा २१८ सिट जित्ने प्रक्षेपण गरेको छ । रिपब्लिकन पार्टीले भने कम्तीमा १६० सिट जित्ने अनुमान छ ।
डेमोक्र्याटको यो जितले राष्ट्रपति डोनाल्ड ट्रम्पको आगामी दुई वर्षको कार्यकालमा प्रत्यक्ष प्रभाव पार्ने देखिएको छ । प्रतिनिधिसभामा विपक्षी दलको बहुमत भए ट्रम्प प्रशासनका निर्णयमाथि निगरानी र छानबिन गर्न डेमोक्र्याटलाई सहज हुनेछ ।
यसै निर्वाचनमा डेमोक्र्याटिक पार्टीले दक्षिण क्यारोलाइनामा जित निकाल्दै सिनेटको दोस्रो सिट पनि रिपब्लिकनबाट खोसेको छ । यसलाई अप्रत्याशित जितका रूपमा हेरिएको छ ।
अमेरिकामा प्रतिनिधिसभाका सबै ४३५ र सिनेटका १०० मध्ये ३५ सिटका लागि निर्वाचन भएको हो । त्यस्तै, गभर्नरसहित राज्य तहका विभिन्न पदमा पनि मतदान भएको छ ।
प्रतिनिधिसभामा डेमोक्र्याटले कति ठूलो बहुमत हासिल गर्छन् भन्ने भने स्पष्ट भइसकेको छैन । रिपब्लिकनले पछिल्ला दुई वर्ष कायम राखेको जस्तै झिनो बहुमत डेमोक्र्याटले पाउँछन् वा ठूलो संख्यामा सिट जित्छन् भन्ने नतिजाले निर्धारण गर्नेछ ।
सिनेटको तुलनामा प्रतिनिधिसभामा बहुमत हासिल गर्न डेमोक्र्याटलाई सहज हुने आकलन गरिएको थियो । त्यसैले प्रतिनिधिसभाको प्रक्षेपणकै आधारमा सिनेटमा पनि डेमोक्र्याटले बहुमत ल्याउने निष्कर्ष निकाल्न सकिँदैन ।
यद्यपि, पछिल्लो प्रक्षेपणले चुनावी माहोल डेमोक्र्याटको पक्षमा रहेको संकेत गरेको छ । देशभर डेमोक्र्याटप्रतिको समर्थन बढिरहेको सर्वेक्षणले देखाएका थिए । चुनावी नतिजाले पनि ती सर्वेक्षणको आकलनलाई बल पुर्याएको छ ।
प्रतिनिधिसभामा बहुमत पाए डेमोक्र्याटले ट्रम्प र उनको परिवारले ह्वाइट हाउस फर्किएयता कसरी आर्थिक लाभ लिइरहेका छन् भन्ने विषयमा छानबिन अघि बढाउन सक्छन् । इरानमा युद्ध सुरु गर्ने निर्णयलगायत ट्रम्प प्रशासनका विवादास्पद कदममाथि पनि अनुसन्धान हुन सक्नेछ ।
त्यस्तै, डेमोक्र्याटले ट्रम्पविरुद्ध तेस्रो पटक महाभियोग प्रक्रिया अघि बढाउन सक्ने सम्भावना पनि छ । यद्यपि, ट्रम्पलाई नै महाभियोग लगाउनुभन्दा उनको मन्त्रिपरिषद्का केही सदस्यविरुद्ध प्रक्रिया अघि बढाउन सक्ने आकलनसमेत गरिएको छ ।
प्रतिनिधिसभामा डेमोक्र्याटको नियन्त्रणले आगामी दुई वर्ष ट्रम्पले अघि बढाउन सक्ने नीति तथा कार्यक्रम र राजनीतिक निर्णयमा अंकुश लगाउन सक्नेछ ।
