१७ वर्षीय यादवले एनपीएल डेब्युमा पहिलो बलमै विकेट लिएर नेपाली क्रिकेटमा आफ्नो नाम दर्ता गराए । जनकपुरका कप्तानले त यादवलाई नेपाली क्रिकेटका अर्को ठूलो नाम भनेर घोषणा नै गरे ।
काठमाडौँ — ‘उनी फिटनेस टेस्ट र क्रिकेट ट्रायलमा उत्कृष्ट देखिए र हामीले खोजेको सीप, भोक र दृढता प्रदर्शन गरे ।’ अक्टोबर २५ को साँझ जनकपुर बोल्ट्सले तेस्रो सिजनका लागि १६ वर्षीय राहुल यादवलाई आफ्नो ‘आइकनिक प्लेयर’ का रूपमा घोषणा गर्दै यसरी गर्व व्यक्त गरेको थियो ।
दुई दिनपछि, ती १७ वर्षीय खेलाडीले नेपाल प्रिमियर लिगमा डेब्यु मात्र गरेनन्, उनले पावरप्लेमा बलिङ गरेका दुई ओभरमा मात्र दुई रन खर्चेर दुई विकेट हात पारे ।
जब कर्णाली याक्स र जनकपुर बोल्ट्सको प्लेइङ इलेभेन सार्वजनिक भयो र दर्जनौँ पत्रकारका फोन बज्न थाले, उनीहरूले यादवलाई प्लेइङ इलेभेनमा देखेपछि मिडिया बक्समा पहिले नै हलचल मच्चिसकेको थियो ।
बोल्ट्सले टस जित्यो र कप्तान हरमीत सिंहले पहिले बलिङ गर्ने निर्णय गरे ।
इङ्ल्यान्डका दिग्गज मोइन अलीले बोल्ट्सतर्फबाट बलिङ आक्रमणको सुरुआत गरे र खतरनाक मार्क वाटलाई पेभिलियन फर्काए । दोस्रो ओभरका लागि नेपालका अनुभवी स्पिनर ललित नारायण राजवंशी आए, जसलाई दीपक डुम्रेले लगातार दुई छक्का प्रहार गरे ।
डुम्रेले अन्तिम बलमा एक रन लिए र तेस्रो ओभरमा स्ट्राइक आफैंसँग राखे । त्यसपछि एउटा अचम्मको कुरा भयो : १६ वर्षीय राहुल यादवलाई बल थमाइयो ।
रौतहटका खुला क्रिकेट मैदानमा खेल्दै हुर्किएका एक किशोर एक महिनाभन्दा कम समयमै नेपाली क्रिकेटको घर र क्रिकेट खेल्ने हरेक नेपालीले एक बल खेल्ने सपना देख्ने ठाउँ—त्रिवि अन्तर्राष्ट्रिय क्रिकेट मैदानमा हजारौं दर्शकसामु उभिएका थिए ।
यादवको पनि त्यस्तै सपना किन नहोस् ?
यादवको फेसबुक प्रोफाइल पिक्चर चन्द्रपुर क्रिकेट लिग २०८२ को म्यान अफ द म्याच अवार्डसँगैको छ । उनको क्याप्सन छ, ‘धेरै समयपछि पीपी चेन्ज’ (इमोजीहरू) । उनले अब पक्कै पनि त्यो तस्बिर परिवर्तन गर्नेछन्, किनकि कर्णालीविरुद्धको खेलपछि उनीसँग धेरै विकल्प हुनेछन् ।
जब यादवले बल समातेर छोटो रनअप लिए, तब उनी पूर्ण रूपमा तयार देखिएका थिए । स्टेडियममा तीव्र गतिका बलिङका दिग्गज सोएब अख्तर उपस्थित भए पनि यादवले कुनै दबाब महसुस गरेका देखिएनन् ।
दायाँहाते मध्यम गतिका बलर यादवले गति बढाउन आफ्नो शरीरको जोर लगाएर सर्ट डेलिभरी फाले, जसलाई डुम्रेले कट गर्ने प्रयास गरे । तर, बल ब्याटको तल्लो किनारामा लागेर स्टम्पमा ठोक्कियो र उनी बोल्ड भए । यसरी व्यावसायिक क्रिकेट खेलाडीका रूपमा आफ्नो पहिलो बलमै यादवले विकेट हात पारे ।
र उनको यो शानदार डेब्युको कथा त्यहीँ समाप्त हुँदैन ।
डुम्रेको स्थानमा पाकिस्तानी अनुभवी अलराउन्डर हुसेन तलात आए । तर, यादवले यी वरिष्ठ खेलाडीलाई नियन्त्रणमा राख्न सफल भए । लगातार चार डट बलपछि तलातले यादवको ओभरको अन्तिम बलमा एक रन लिएर अन्ततः आफ्नो खाता खोले ।
जिमी नीशम र मोइन अलीले एक–एक छक्का खाए पनि क्रमशः चौथो र पाँचौं ओभर सम्हाले । त्यसबेला कर्णाली २ विकेटको क्षतिमा ३७ रनमा थियो, जहाँ आरिफुल इस्लाम (९ बलमा १९ रन) र तलात (११ बलमा ३ रन) क्रिजमा थिए ।
जनकपुरका कप्तानले फेरि एकपटक टोलीका सबैभन्दा युवा खेलाडीमाथि विश्वास गर्ने निर्णय गरे । अनि यादवले फेरि कमाल गरे ।
ओभरको सुरुमा दुई डट बलपछि दबाबमा रहेका तलात अनिल कुमार साहको हातबाट क्याच आउट भए । पावरप्लेको अन्तिम ओभरमा यादवले मात्र एक रन दिए ।
खेलभरि यादवले आफ्नो चार ओभरको जादुमयी स्पेलमा मात्र १५ रन खर्चे । याक्सलाई १३२/९ को सामान्य योगफलमा रोक्न बोल्ट्सलाई मद्दत गर्न यादवको ठूलो हात थियो ।
तर, बोल्ट्सले उक्त लक्ष्य भेट्टाउन सकेन । टोली १९.३ ओभरमा ११३ रनमै अलआउट भयो । जनकपुरका लागि आउट नभई क्रिजमा टिकिरहने एक्ला ब्याट्सम्यान यादव थिए, जसले १० बलमा १ रन बनाए ।
१६औँ ओभरको पहिलो दुई बलमा जिमी नीशम र आदित्य महतालाई आउट गरेर युनिश विक्रम सिंह ठकुरी ह्याट्रिकको नजिक पुगेका थिए । त्यतिबेला यादव दशौं विकेटका रूपमा क्रिजमा आए । चरम दबाबका बाबजुद यादवले ठकुरीलाई उक्त व्यक्तिगत उपलब्धि हासिल गर्नबाट मात्र रोकेनन्, अर्को तीन बलसम्म विकेट जोगाइराखे र अभिषेक तिवारीसँग स्ट्राइक रोटेट गरे । तिवारीले पछि दुई छक्का प्रहार गरे ।
जनकपुर १९ रनले पराजित भयो । यादवले आफ्नो एनपीएल डेब्युमा हार व्यहोरे । तर, उनी धेरै दुःखी हुनुपर्ने छैन, किनभने उनले आफ्नोतर्फबाट शतप्रतिशत दिएका थिए । उनको इच्छा पनि त्यही त थियो ।
‘आफ्नो टिमका लागि शतप्रतिशत दिनेछु,’ छनोट भएमा के गर्नुहुन्छ भनी सोधिएको प्रश्नको जवाफमा जनकपुर बोल्ट्सले सार्वजनिक गरेको भिडियोमा यादवले भनेका थिए ।
अक्टोबर १६ मा पोस्ट गरिएको उक्त भिडियोमा फ्रेन्चाइजको ‘ट्यालेन्ट हन्ट’ अन्तर्गत मधेश प्रदेशभरिबाट छानिएका सात किशोरमध्ये यादव पनि एक हुन् । उनीहरू बोल्ट्सको ‘विकास टोली’ (डेभलपमेन्ट स्क्वाड) को हिस्सा थिए । यो प्रतियोगिताभर मुख्य टोलीसँगै प्रशिक्षण लिने प्रतिभावान् खेलाडीहरूको समूह हो ।
राहुलबाहेक विकास टोलीका अन्य छ जना आदर्श भण्डारी, खिलराज शर्राफ, नवीनकुमार यादव, रोहनकुमार साह, मो. मिराज र सुशान्त सिंह हुन् ।
क्रिकेटका दिग्गज तथा मुख्य प्रशिक्षक शिवनारायण चन्द्रपौलसहितको बोल्ट्स टोलीले यादवलाई ‘आइकनिक प्लेयर’ का रूपमा छनोट गर्ने र सिजनको सुरुदेखि नै मैदानमा उतार्ने निर्णय गर्नु कुनै संयोग मात्र थिएन ।
खेलपछिको पत्रकार सम्मेलनमा जनकपुरका कप्तान सिंहले भने, ‘मलाई लाग्छ, उनी निकै चलाख छन् । जसले उनीविरुद्ध कहिल्यै खेलेको छैन, उसलाई पहिलो केही बल सामना गर्न सधैँ कठिन हुनेछ ।’
‘उनमा जुन सीप छ, त्यसले उनलाई थप अवसर दिलाउनेछ । उनी साँच्चै नेपाली क्रिकेटका अर्को ठूलो स्टार बन्न सक्छन् । उनीसँग गति पनि छ, जुन पक्कै पनि नेपालको राष्ट्रिय टोलीलाई चाहिएको छ । मलाई लाग्छ, उनले गर्नुपर्ने भनेको शान्त भएर निरन्तर मिहिनेत गरिरहनु मात्र हो ।’
नायक पौडेल काठमाडौं पोस्टका खेल संवाददाता हुन् ।
