जेनजी किन वास्तविक सम्बन्धभन्दा अनलाइनमै रमाउँदैछन् ? यस्तो छ कारण

जेनजी पुस्ताका युवामा वास्तविक जीवनमा भेटघाट र सम्बन्ध अघि बढाउने प्रवृत्ति घटिरहेको विषय चर्चामा छ। वयस्क मनोरञ्जन क्षेत्रमा काम गर्ने ३७ वर्षीया एलिक्स लिंक्सका अनुसार यसको एउटा सम्भावित कारण सामाजिक सञ्जाल र डेटिङ एपको बढ्दो प्रयोग हो।

किन्से इन्स्टिच्युटको एक अध्ययनले युवा वयस्कमा यौन गतिविधि कम भइरहेको देखाएपछि लिंक्सले यसको कारणबारे आफ्नो धारणा सार्वजनिक गरेकी हुन्।

‘इमानदारीपूर्वक भन्नुपर्दा, मलाई लाग्छ पोर्न यसको सबैभन्दा कम प्रभाव पार्ने पक्ष हो। पोर्न पहिलेदेखि नै अस्तित्वमा थियो। मेरो विचारमा सामाजिक सञ्जाल र डेटिङ एप धेरै ठुला कारण हुन्,’ उनले भनेकी छन्।

उनका अनुसार सामाजिक सञ्जाल र डेटिङ एपले युवालाई वास्तविक जीवनमा भेट्नुभन्दा अनलाइनमै कुराकानी गर्न सहज बनाएका छन्। धेरै व्यक्तिको प्रोफाइल हेर्ने र नयाँ मानिससँग जोडी मिलाउने सुविधाले वास्तविक सम्बन्ध अघि बढाउने निर्णयसमेत पछाडि धकेल्न सक्छ।

पोर्नले पनि बढाउन सक्छ अवास्तविक अपेक्षा लिंक्सले सामाजिक सञ्जाल र डेटिङ एपलाई प्रमुख कारण माने पनि पोर्नलाई पूर्ण रूपमा दोषमुक्त भने गरेकी छैनन्। उनका अनुसार पोर्नमा देखाइने दृश्यलाई वास्तविक जीवनमा पनि त्यस्तै हुनुपर्छ भन्ने ठान्दा सम्बन्धमा असहजता सिर्जना हुन सक्छ।

‘मैले पहिले भेटेका केही पुरुषले मेरा दृश्यमा देखेका व्यवहार दोहोर्‍याएका थिए। त्यतिबेला म सोच्थें, “मैले अभिनय गर्दा गर्ने कुरा वास्तविक जीवनमा गर्दिनँ।” पोर्न अभिनय हो, आत्मीय सम्बन्ध बनाउने नमुना होइन,’ उनले भनेकी छन्।

लिंक्सले सन् २०१४ मा कर्पोरेट क्षेत्रको जागिर छाडेर वयस्क मनोरञ्जन क्षेत्रमा प्रवेश गरेकी थिइन्।

डेटिङ एपमा नयाँ व्यक्ति खोज्दाखोज्दै सम्बन्ध पछि लिंक्सका अनुसार डेटिङ एपमा लगातार नयाँ व्यक्तिको प्रोफाइल हेर्ने बानीले मानिसलाई आफूले भेटिरहेको व्यक्तिसँग सम्बन्ध अघि बढाउनबाट रोक्न सक्छ। अझ राम्रो विकल्प भेटिने आशामा मानिसहरू वास्तविक भेटघाट गर्नुभन्दा अनलाइनमै सीमित हुन सक्छन्।

‘डेटिङ एपले मानिसहरूको अन्त्यहीन विकल्प दिन्छ। तपाईं लगातार प्रोफाइल हेर्न र नयाँ व्यक्तिसँग जोडी मिलाउन सक्नुहुन्छ। त्यसबाट पनि तत्काल सन्तुष्टि मिल्न थाल्छ,’ उनले भनेकी छन्।

उनका अनुसार कुनै व्यक्तिसँग जोडी मिलेपछि वास्तविक जीवनमा भेट्ने निर्णय लिनुको सट्टा कतिपय मानिस लामो समयसम्म अनलाइन कुराकानीमै सीमित हुन्छन्। त्यसपछि फेरि नयाँ व्यक्ति खोज्न थाल्छन्।

सामाजिक सञ्जालमा पनि यस्तै प्रवृत्ति देखिने उनको भनाइ छ। कुनै व्यक्ति मन परेपछि कुराकानी सुरु गर्ने तर अर्को आकर्षक व्यक्ति देखिनासाथ ध्यान अन्तै जाने बानीले सम्बन्धलाई निरन्तरता दिन कठिन बनाउन सक्छ।

अनलाइन बानीले प्रत्यक्ष संवादमा पनि असर लिंक्सका अनुसार डिजिटल माध्यममा बढी निर्भर हुँदा मानिसको आमनेसामने कुराकानी गर्ने सीपसमेत प्रभावित हुन सक्छ। स्क्रिनबाट कुरा गर्न सहज भए पनि वास्तविक जीवनमा नयाँ व्यक्तिसँग परिचय गर्ने र आफ्नो रुचि व्यक्त गर्ने काम कठिन लाग्न सक्छ।

यसैबिच, ओन्लीफ्यान्ससम्बन्धी खोज प्लेटफर्म ओन्लीसर्चका अनुसार सन् २०२६ मा ७३ लाख खोज दर्ता भएका थिए। ‘जोडी’ र ‘पत्नी’ जस्ता शब्द शीर्ष २० खोजमा परेका थिए। यसले केही प्रयोगकर्ताको रुचि सम्बन्ध र आत्मीयतासँग जोडिएका विषयमा पनि रहेको संकेत गर्छ।

लिंक्सका अनुसार डिजिटल माध्यमले मानिसलाई जोड्न सजिलो बनाए पनि वास्तविक सम्बन्धको ठाउँ लिन सक्दैन। अर्थपूर्ण सम्बन्धका लागि प्रत्यक्ष भेटघाट, संवाद र एक अर्कालाई समय दिनु आवश्यक हुन्छ।

प्रकाशित: १० कार्तिक २०८३ २०:५१ मंगलबार